ಹೀಗೊಂದು ಗೆಳೆತನ

ಹೀಗೊಂದು ಗೆಳೆತನ
ಇದಕಿಲ್ಲ ಆಧುನಿಕತೆಯ ಸಿರಿತನ

ಕಿರುನಗುವಿನ ಸ್ವಾಗತ
ಕಣ್ಣೋಟದಲೇ  ಸಿಹಿಮಾತು
ಕಾಣದಿದ್ದರೆ ಮಾತ್ರ ಏನೋ ದುಗುಡ
ಇದು ಬಸ್ಸಿನಲ್ಲಿ ಪಯಣಿಸುವ ಅಪರಿಚಿತರ ಪರಿಚಯ

ಈ ಸ್ನೇಹಕೆ ಬೇಕಿಲ್ಲ ಜಂಗಮದ ಕೊಂಡಿ
ಅಂತರ್ಜಾಲವೆಂದೂ ಮಾಡದು ಸಂಧಿ
ಎಮ್  ಪೆಸರನೂ ಸರಿಯಾಗಿ ಅರಿಯದವರು
ಬಸ್ ಎಂಬ ಲೋಕದಲ್ಲಷ್ಟೇ ಚಿರಪರಿಚಿತರು

ಬದುಕ ಬಂಡಿಯ ಈ ಯಾನದೊಳು
ರಂಗ ತುಂಬುವರು ,ನಲಿವ ಹಂಚುವರು
ಅಡರು ತೊಡರಿನ ಈ ರಸ್ತೆಯಲಿ
ದಟ್ಟಣೆಯೊಡನೆ ಮಂದಗತಿಯಲಿ ಸಾಗುವ ನಮ್ಮೀ  ಯಾನದಲಿ

ಕಾಯುವಿಕೆಯ ಕಾವು ಇಲ್ಲೂ ಉಂಟು
ನಮ್ಮ ಬಂಡಿಗಾಗಿ,ಅವರ ಬರುವಿಗಾಗಿ
ಬರದಿದ್ದರೆ ಕಾವಿನ ಕಸುವು,ಕಾಯುತಲಿರುವುದು
ಭೂಮಿಯ ಮತ್ತೊಂದು ಸುತ್ತಿಗೆ,ಮತ್ತದೇ ಸಮಯಕೆ ಅವರ ಬರುವಿಕೆಗೆ

ಬಂಡಿಯಲ್ಲಿಯೇ ಇದರ ಉಗಮ ಇಲ್ಲಿಯೇ ಅಂತ್ಯ
ಇದರಾಚೆ ಮತ್ತದೇ ಜಂಗಮ ಅಂತರ್ಜಾಲದಿ ವಿಹರ
ಇವುಗಳಿಗಿಂತ ಬಲು ವಿಶಿಷ್ಟ ಈ ಗೆಳೆತನ
ಇದಕಿಲ್ಲ ಆಧುನಿಕತೆಯ ಸಿರಿತನ